فاكر لما كنت وانت نايم بتحلم حلم حلو وعند اللحظة الحاسمة في الحلم يجي حد م الواقع - وغالبا هو حد رخم - ويصحيك ، ويقولك بكل ما أوتي من رخامة ( صباح الخير ) !!
صباح الزفت ع دماغك يا حوبي < طبعا دي الاجابة الثابتة لانك متغاظ علشان مكملتش الحلم ^_________^ .
----
الموقف ده لو تفتكر اتكرر معاك بئا على التوالى من اول آخر سنة في الإعدادية وبإذن الله هو مكمل معاك لحد ما نسمع خبرك كده :D
-
قارئي العزيز ، الدنيا هي الحد الرخم اللى اتكلمت عنه فوق ، وهي اللى دايما هتيجى تصحيك من كل احلامك وتقولك ببرود ( صباح الخير ) ، طب مفكرتش هي ليه سايقة عليك الرخامة يعني !
ليه مش راضيه تسيبك تكمل حلم واحد للنهاية وتصحي منتشي بئا وتبتسم انت ف وشها وتقولها بارتياح عظيم ( صباح السعادة ) ،، ببساطة يا صديقي إحنا مش جايين الدنيا علشان نكمل أحلامنا !!
مستغرب ولا عارف وساكت ؟! ،، شكلك عارف ومدكّن يا نمس انت :D
-----
نرجع تانى للسرير والحلم ،، فاكر لما بعد ما تسمع صباح الخير كنت بتغمض عينيك وتنام تاني وتكمل على مزاجك ؟! ،، والله كلنا عملناها متتكسفش
-
ليه بئا ما بتعملش كده مع الاحلام اللى تملي الدنيا تصحيك ف آخر لقطة دايما وتقولك صباح الخير ؟! ،، ليه مبتكبرش راسك وتغمض وتكمل حلمك ،،
غمّض يا صاحبي عن رخامة الدنيا وندالتها المستمرة معاك في كل صباح
----
من أيام إعدادي تحاول تجيب مجموع يدخلك ثانوي مرتاح فتسقطك الرياضيات او العربي ^_^
تجتهد في الثانوي او بمعنى اوضح تنتحر علشان تجيب مجموع الكليه اللى بتحلم بيها فيقوم الدكتور الغتت ( اللى هو الدنيا ) يسقطك او ينزلك ف مادة عشانه بنته الكتكوتة
فتضطر تجيب مجموع كلية المفروض تدخلها بنته :D
--
وهكذا دواليك ،، تحب بنت ٍ ما وتحاول ترتبط فاهلها يرفضوك علشان معندكش شقة او عندك بس بعيدة ،، صباح الخير ^_^
---
تدور على وظيفة تحقق بيها حتة من احلامك اللى قربت تعفن جواك ،، تلاقي المدير بيكرهك ، وتلاقي الوظيفة مواعيدها زباله ... صباح الخير ^_^
وانت عارف الباقي بئا :D
------------------
ليه يا صديقي متحاولش تكمل الحلم بعد صباح الخير ؟!
ليه سايب الدنيا تضربك وتكسبك جولة ورا جولة ....
الحل الوحيد هو إنك تعمل شئ م الاتنين ، يا تحلم احلام على اد الوقت المتاح من عمرك يا تكمل طول عمرك نايم !!
---
وختاما ،، صباح الخير ،، ^______^
---.jpg)
* ملحوظة /
باعتذر علشان استخدمت اللهجة العامية المصرية ، وباعتذر عن بعض الانفعالات الواردة في المقال . ،، دمتم بود احبتي
ههههههههههههه فكرة المقال حلوة ولذيدة وعموما صباح الخير :)
ردحذف